ನವದೆಹಲಿ: ಸೆಪ್ಟೆಂಬರ್ 10: ಭಾರತೀಯ ನೌಕಾಪಡೆಯ ನೌಕಾ ತರಬೇತಿ ಹಡಗು ಐಎನ್ಎಸ್ ಸುದರ್ಶಿನಿ ಸೆಪ್ಟೆಂಬರ್ 9ರಂದು ಇಟಲಿಯ ಲಿವೊರ್ನೊ ಬಂದರು ತಲುಪಿದೆ. ‘ಲೋಕಾಯಣ 2026’ ಸಾಗರದಾಚೆಯ ದಂಡಯಾತ್ರೆಯ ಭಾಗವಾಗಿರುವ ಹಡಗು, ಈಗಾಗಲೇ 10 ದೇಶಗಳಲ್ಲಿ 17,400ಕ್ಕೂ ಹೆಚ್ಚು ನಾಟಿಕಲ್ ಮೈಲುಗಳ ಪ್ರಯಾಣ ಪೂರ್ಣಗೊಳಿಸಿದೆ.
ಭಾರತದ ಶ್ರೀಮಂತ ನೌಕಾಯಾನ ಪರಂಪರೆಯನ್ನು ಜಗತ್ತಿಗೆ ಪರಿಚಯಿಸುವುದರ ಜತೆಗೆ, ಪಾಲುದಾರ ರಾಷ್ಟ್ರಗಳೊಂದಿಗೆ ನೌಕಾ ಸಹಕಾರ ಮತ್ತು ಜನರಿಂದ ಜನರಿಗೆ ಬಾಂಧವ್ಯವನ್ನು ಮತ್ತಷ್ಟು ಬಲಪಡಿಸುವುದು ಈ ನಿಯೋಜನೆಯ ಪ್ರಮುಖ ಉದ್ದೇಶವಾಗಿದೆ.
ಲಿವೊರ್ನೊ ತಲುಪುವ ಮುನ್ನ ಮೆಡಿಟರೇನಿಯನ್ ಸಮುದ್ರದಲ್ಲಿ ಐಎನ್ಎಸ್ ಸುದರ್ಶಿನಿ, ಇಟಲಿ ನೌಕಾಪಡೆಯ ನೌಕಾ ತರಬೇತಿ ಹಡಗು ಐಟಿಎಸ್ ಪಾಲಿನುರೊ ಜತೆ ‘ಪ್ಯಾಸೇಜ್ ಎಕ್ಸರ್ಸೈಸ್’ (PASSEX) ನಡೆಸಿತು.
ಇದರಲ್ಲಿ ಸಂಘಟಿತ ನೌಕಾಯಾನ, ಸಮನ್ವಯದ ಕುಶಲತೆ ಹಾಗೂ ನೌಕಾ ನಿರ್ವಹಣಾ ಅಭ್ಯಾಸಗಳನ್ನು ನಡೆಸಲಾಯಿತು. ಎರಡೂ ದೇಶಗಳ ಸಿಬ್ಬಂದಿ ಜತೆಯಾಗಿ ಕಾರ್ಯನಿರ್ವಹಿಸುವ ಮೂಲಕ ವೃತ್ತಿಪರ ಅನುಭವ ಹಾಗೂ ಪರಿಣತಿಯನ್ನು ಪರಸ್ಪರ ಹಂಚಿಕೊಂಡರು.
ಇಟಲಿಯ ಪ್ರತಿಷ್ಠಿತ ಅಕಾಡೆಮಿಯಾ ನವೇಲ್ ನೆಲೆಯಾಗಿರುವ ಲಿವೊರ್ನೊ, ಭಾರತ–ಇಟಲಿ ನೌಕಾಪಡೆಗಳ ನಡುವಿನ ವೃತ್ತಿಪರ ಸಹಕಾರಕ್ಕೆ ಮತ್ತಷ್ಟು ಅವಕಾಶ ಕಲ್ಪಿಸಲಿದೆ.
ಬಂದರು ಭೇಟಿಯ ವೇಳೆ ಭಾರತೀಯ ತರಬೇತಿದಾರರು ಹಾಗೂ ಇಟಲಿ ಕೆಡೆಟ್ಗಳ ನಡುವೆ ಕ್ರಾಸ್-ಡೆಕ್ ಭೇಟಿಗಳು ಮತ್ತು ವೃತ್ತಿಪರ ಸಂವಾದಗಳು ನಡೆಯಲಿವೆ. ಸ್ಥಳೀಯ ಸಮುದಾಯದವರು ಐಎನ್ಎಸ್ ಸುದರ್ಶಿನಿಗೆ ಭೇಟಿ ನೀಡಿ ಭಾರತೀಯ ನೌಕಾಪಡೆಯ ನೌಕಾಯಾನ ತರಬೇತಿ ಹಡಗನ್ನು ವೀಕ್ಷಿಸಲು ಅವಕಾಶವೂ ಕಲ್ಪಿಸಲಾಗಿದೆ.
‘ಲೋಕಾಯಣ 2026’ ದಂಡಯಾತ್ರೆಯು ನೌಕಾ ಸಂವಹನ, ತರಬೇತಿ ಹಾಗೂ ಸಾಂಸ್ಕೃತಿಕ ವಿನಿಮಯದ ಮೂಲಕ ವಿವಿಧ ರಾಷ್ಟ್ರಗಳೊಂದಿಗೆ ಕಡಲ ಪಾಲುದಾರಿಕೆಯನ್ನು ಬಲಪಡಿಸುವ ಉದ್ದೇಶ ಹೊಂದಿದೆ.
ಈ ದಂಡಯಾತ್ರೆಯು ಭಾರತದ ಕಡಲ ಸಹಕಾರವನ್ನು ವಿಸ್ತರಿಸುವುದರ ಜತೆಗೆ, ‘ಮಹಾಸಾಗರ’ (MAHASAGAR) ದೃಷ್ಟಿಕೋನದಡಿ ಪ್ರದೇಶಗಳಾದ್ಯಂತ ಭದ್ರತೆ ಮತ್ತು ಬೆಳವಣಿಗೆಗೆ ಪರಸ್ಪರ ಹಾಗೂ ಸಮಗ್ರ ಪ್ರಗತಿಗೆ ಭಾರತದ ಬದ್ಧತೆಯನ್ನು ಪ್ರತಿಬಿಂಬಿಸುತ್ತದೆ ಎಂದು ಭಾರತೀಯ ನೌಕಾಪಡೆ ತಿಳಿಸಿದೆ.
ದೀರ್ಘ-ದೂರದ ಈ ನಿಯೋಜನೆಯ ಮೂಲಕ ಐಎನ್ಎಸ್ ಸುದರ್ಶಿನಿ ಭಾರತದ ನೌಕಾಯಾನ ಪರಂಪರೆಯನ್ನು ಜಗತ್ತಿನ ವಿವಿಧ ಕಡಲ ರಾಷ್ಟ್ರಗಳಿಗೆ ಪರಿಚಯಿಸುವುದರೊಂದಿಗೆ ಸ್ನೇಹ ಮತ್ತು ವೃತ್ತಿಪರ ಬಾಂಧವ್ಯವನ್ನು ಮತ್ತಷ್ಟು ಗಟ್ಟಿಗೊಳಿಸುತ್ತಿದೆ.
