ಟೆಹ್ರಾನ್: ಅಮೆರಿಕ ಮತ್ತು ಇರಾನ್ ನಡುವಿನ ಸಂಘರ್ಷ ಮತ್ತಷ್ಟು ತೀವ್ರಗೊಂಡಿದ್ದು, ಜೋರ್ಡಾನ್ನಲ್ಲಿರುವ ಅಮೆರಿಕದ ಸೇನಾ ನೆಲೆಯ ಮೇಲೆ ಬ್ಯಾಲಿಸ್ಟಿಕ್ ಕ್ಷಿಪಣಿ ದಾಳಿ ನಡೆಸಿರುವುದಾಗಿ ಇರಾನ್ನ ಇಸ್ಲಾಮಿಕ್ ರೆವಲ್ಯೂಷನರಿ ಗಾರ್ಡ್ ಕಾರ್ಪ್ಸ್ (IRGC) ಬುಧವಾರ ಹೇಳಿಕೊಂಡಿದೆ. ಇದೇ ವೇಳೆ ಹಾರ್ಮುಜ್ ಜಲಸಂಧಿಯಲ್ಲಿ ಅಮೆರಿಕದ ಮಾನವರಹಿತ ನೀರೊಳಗಿನ ಡ್ರೋನ್ವೊಂದನ್ನು ವಶಪಡಿಸಿಕೊಂಡಿರುವುದಾಗಿಯೂ IRGC ತಿಳಿಸಿದೆ.
ಇರಾನಿನ ತೈಲ ಟ್ಯಾಂಕರ್ಗಳ ಮೇಲೆ ಅಮೆರಿಕ ನಡೆಸಿದ ದಾಳಿಗೆ ಪ್ರತೀಕಾರವಾಗಿ ಈ ಕ್ರಮ ಕೈಗೊಳ್ಳಲಾಗಿದೆ ಎಂದು ಟೆಹ್ರಾನ್ ಹೇಳಿದೆ.
ಜೋರ್ಡಾನ್ನ ಅಲ್-ಅಜ್ರಾಕ್ನಲ್ಲಿರುವ ಅಮೆರಿಕದ ವಾಯುನೆಲೆಯನ್ನು ಗುರಿಯಾಗಿಸಿಕೊಂಡ ದಾಳಿಯಿಂದ ವಿಮಾನ ನಿರ್ವಹಣಾ ಸೌಲಭ್ಯಗಳು, ಸೇನಾ ಸ್ಥಾಪನೆಗಳು ಹಾಗೂ ಯುದ್ಧವಿಮಾನಗಳ ಆಶ್ರಯಗಳಿಗೆ ಹಾನಿಯಾಗಿದೆ ಎಂದು IRGC ಹೇಳಿದೆ.
ಆದರೆ, ಜೋರ್ಡಾನ್ ಸೇನೆ ದೇಶದತ್ತ ಹಾರಿಸಲಾದ 18 ಇರಾನಿನ ಕ್ಷಿಪಣಿಗಳನ್ನು ತಡೆದು ನಾಶಪಡಿಸಿರುವುದಾಗಿ ತಿಳಿಸಿದೆ.
ಇರಾನ್ನ ತೈಲ ಟ್ಯಾಂಕರ್ಗಳ ಮೇಲಿನ ದಾಳಿ ಮುಂದುವರಿದರೆ, ಅಮೆರಿಕದ ಮಿತ್ರ ರಾಷ್ಟ್ರಗಳಾದ ಕುವೈತ್ ಮತ್ತು ಬಹ್ರೇನ್ ಸಮೀಪ ಕಾರ್ಯನಿರ್ವಹಿಸುತ್ತಿರುವ ತೈಲ ಟ್ಯಾಂಕರ್ಗಳನ್ನೂ ಗುರಿಯಾಗಿಸಬಹುದು ಎಂದು ಟೆಹ್ರಾನ್ ಎಚ್ಚರಿಸಿದೆ. ಈ ಪ್ರದೇಶದಲ್ಲಿರುವ ಟ್ಯಾಂಕರ್ಗಳ ಸಿಬ್ಬಂದಿ ಹಡಗುಗಳನ್ನು ತೊರೆಯುವಂತೆ IRGC ಸೂಚಿಸಿದೆ ಎಂದು ವರದಿಯಾಗಿದೆ.
ಈ ನಡುವೆ ಹಾರ್ಮುಜ್ ಜಲಸಂಧಿಯಲ್ಲಿ ಅತ್ಯಾಧುನಿಕ ಮಾನವರಹಿತ ನೀರೊಳಗಿನ ಡ್ರೋನ್ ವಶಪಡಿಸಿಕೊಂಡಿರುವುದಾಗಿ ಇರಾನ್ ಹೇಳಿಕೊಂಡಿದೆ. ಆದರೆ, ಡ್ರೋನ್ ತಾಂತ್ರಿಕ ದೋಷಕ್ಕೊಳಗಾಗಿದ್ದ ಹಳೆಯ ಮಾದರಿಯಾಗಿದ್ದು, ಸೂಕ್ಷ್ಮ ಮಾಹಿತಿ ಹೊಂದಿರಲಿಲ್ಲ ಎಂದು ಅಮೆರಿಕ ಸೇನೆ ಈ ಹೇಳಿಕೆಯನ್ನು ತಳ್ಳಿಹಾಕಿದೆ.
